'ബെത്‌ലഹേം കുടുംബ യൂണിറ്റ്' എന്ന ചിത്രത്തിലെ 'യവനകഥയിൽ നിന്നുവന്ന…' എന്ന ഗാനം ഇപ്പോൾ ഏറെ തരംഗമാവുകയാണ്. ജോഷി സംവിധാനം ചെയ്യാനിരുന്ന 'അന്ന' എന്ന സിനിമയിലെ ഗാനമാണിത്. അരവിന്ദ് സ്വാമിയായിരുന്നു നായകൻ. എന്നാൽ ആ സിനിമ പിന്നീട് ഉപേക്ഷിച്ചു. ഇപ്പോഴിതാ, താൻ അങ്ങനെയൊരു സിനിമ ചെയ്യാമെന്ന് ഏറ്റിരുന്നില്ലെന്ന് വ്യക്തമാക്കി രംഗത്തെത്തിയിരിക്കുകയാണ് അരവിന്ദ് സ്വാമി. ശിവാജി ഗണേശന്റെ മകനും നടനുമായ രാംകുമാറിന്റെ ട്രൂലി റാം എന്ന പോഡ്കാസ്റ്റ് ഷോയിൽ പങ്കെടുക്കവേയാണ് അന്ന എന്ന ചിത്രത്തെക്കുറിച്ച് അരവിന്ദ് സ്വാമിയുടെ വെളിപ്പെടുത്തൽ.
'യഥാർഥത്തിൽ ആ പേരിലുള്ള ഒരു സിനിമ ഞാൻ ചെയ്യാമെന്ന് ഏറ്റിരുന്നില്ല. എന്തോ ഒരു കമ്മ്യൂണിക്കേഷൻ പ്രശ്നം അക്കാലത്ത് നടന്നിരുന്നു. എന്റെ പേരിൽ ആരാണ് ആ സിനിമയുടെ അണിയറപ്രവർത്തകരെ ബന്ധപ്പെട്ടതെന്ന് അറിയില്ല. ഞാൻ ആ സിനിമയുടെ കഥ കേട്ടിട്ടില്ല. എനിക്ക് ആ സിനിമയുമായി യാതൊന്നും അറിയില്ല. ആ സമയത്ത് ഞാൻ ഈ ഇൻഡസ്ട്രിയിൽ പുതിയ ആളായിരുന്നു.
അന്ന എന്ന സിനിമ ഞാൻ ചെയ്യുമെന്ന് പറഞ്ഞ് ആരാണ് അവരോട് സംസാരിച്ചതെന്ന് അറിയില്ല. ഞാൻ ആ സിനിമ ചെയ്യുമെന്ന് അവർ സ്വയം കരുതിയതാണോയെന്നും അറിയില്ല. ആ സിനിമയിൽ ഞാൻ അഭിനയിച്ചിട്ടേയില്ല." അരവിന്ദ് സ്വാമി പറഞ്ഞു. യവനകഥയിൽ നിന്നുവന്ന എന്ന ഗാനം വലിയ ഹിറ്റാണല്ലോ എന്ന് പറഞ്ഞപ്പോൾ താൻ അങ്ങനെ കേട്ടു എന്നായിരുന്നു അരവിന്ദ് സ്വാമിയുടെ മറുപടി.
The Unreleased 'Anna' x 'BKU' Connection Revealed by Aravind Swamy.😳 https://t.co/x2No0YiqPQ
എൻ.മോഹനന്റെ തിരക്കഥയിൽ ജോഷി സംവിധാനം ചെയ്യാനിരുന്നു ചിത്രമായിരുന്നു 'അന്ന'. ചിത്രം 30 വർഷത്തിനു ശേഷം വെള്ളിത്തിരയിലേക്ക് എത്തുമെന്ന് നിർമാതാവ് ടോമിച്ചൻ മുളകുപാടം അറിയിച്ചിരുന്നു. 'പുലിമുരുകന്റെ' പത്താം വാര്‍ഷിക ദിനത്തിലാണ് നിർമാതാവിന്റെ പ്രഖ്യാപനം നടന്നിരുന്നത്.
Content Highlights: Actor Aravind Swamy has stated that he has no connection with the film Anna. He also said he does not know who contacted the film's crew.